فتح طاهر أبو زيد نجم منتخب مصر والنادي الأهلي السابق النار على منظومة اتحاد كرة القدم وذلك خلال احد لقاءاته الإعلامية بقناة النيل للرياضة حيث صرح ان مانمر به الآن ليس تأخر كرويا ولكن نحن منهارين إداريا
وقالها بوضوح موجع: إحنا مش متأخرين كرويًا… إحنا منهارين إداريًا.
إحنا بنتكلم عن بطولات وإفريقيا والعالم، وإحنا شغالين بدوري بلا روح، بلا عدالة، بلا مفاجآت. دوري ميت، نتيجته معروفة قبل ما يبدأ، ولوائحه بتتكتب بالقلم الرصاص وتمسح على حسب الهوى. دي مش مسابقة… دي مسرحية.
برا بيحسبوا الزمن اللي بتتبني فيه الهجمة، وبيطوروا التفاصيل، وإحنا هنا لسه بنتخانق: مين ليه ومين عليه.
إزاي تطلب من منتخب يكسب، وهو داخل البطولة مكسور إداريًا؟
إزاي تحلم بإنجاز، وأندية بتتاجر باسم الوطن، وتقدّم مصالحها على قميص المنتخب من غير أي حساب؟
الحقيقة اللي بتوجع إن الخسارة مش في ماتش ولا بطولة…
الخسارة في عقلية بتدير، ومنظومة بتقتل أي أمل قبل ما يولد.
وطول ما الفشل لابس بدلة إدارة،
أي حلم بكأس… هيبقى مجرد وهم بنضحك بيه على نفسنا