كتبت: آية حجاج
أسدل الستار عن رحلة الحارس المخضرم شريف إكرامي حارس مرمى الفريق الأول لكرة القدم بنادي بيراميدز والأهلي السابق لينهي مشواره في الملاعب، بعدما أعلن اعتزاله كرة القدم بشكل رسمي، بعد مسيرة طويلة امتدت لأكثر من ثلاثة عقود شهدت العديد من النجاحات والمحطات المهمة خلال الفترة الماضية.
حرص إكرامي على إختيار إعلان قراره عبر مقطع فيديو نشره على حسابه الرسمي بموقع التواصل الاجتماعي «فيسبوك»، مرفقًا برسالة قصيرة وكتب: «بعد أكتر من 30 سنة، من قلبي بقولكم وبقول للكورة، شكراً»، قبل أن يوجه رسالة مطولة خلال الفيديو.
استهل شريف إكرامي حديثه، قائلًا: «بعد أكتر من 30 سنة جاء الوقت اللي أودع فيه الملعب وأعلق الجوانتي، وجاء وقت إني اخد قرار يمكن كل لاعب بيبقى عارف إنه هييجي في يوم من الأيام لكنه عمره ما بيبقى سهل، لأنك مش بتسيب شغلانة أنت بتسيب حياة كاملة».
ووجه الحارس المخضرم الشكر للأندية خلال مسيرته، قائلًا: «شكراً لكل نادي لعبت فيه، فينورد و الجونه كل واحد فيكم ضاف لي كتير كانسان مش بس كلاعيب، شكراً بيراميدز اللي ختمت فيه و كنت محظوظ اكون جزء من جيل حفر تاريخ لنفسه و للنادي».
كما خص القلعة الحمراء برسالة مؤثرة، وقال: «هيفضل للنادي الأهلي مكانة مختلفة في قلبي، الأهلي مش مجرد نادي لعبت فيه، ده المكان اللي اتولدت فيه، كبرت واتعلمت و نضجت فيه، ومنه الناس عرفتني و حققت فيه كل اللي كنت بحلم بيه كلاعب، الاهلي غير اي حد».
واصل إكرامي رسالته: «شكراً لكل مدرب دربني ولكل لاعب شاركني أوضة اللبس، ولكل عامل وإداري اشتغل في صمت عشان يساعدنا ننجح، شكراً لكل الجمهور اللي ساندني في الرحله، وشكراً لكل اللي انتقدوني، لأنكم كنتو سبب في الإنسان اللي بقيت عليه النهارده، وعشت معاكم أجمل لحظات في حياتي واتعلمت منكم في أصعبها».
وأتم شريف إكرامي رسالته باكيًا بتوجيه بعض كلمات الشكر إلى عائلته، قائلًا: «شكراً لعيلتي اللي كانت حاضره في كل لحظة، واستحملت ضغوطات الشغلانه أوقات أكتر مني أنا، من قلبي بقولكم وبقول للكورة، شكراً».
